L'CANCHON DORMOIRE

Canchon Dormoire

le P'tit Quinquin

 

dscn8508-001.jpg

pour ecouter un extrait interprété par Jean-mi cliquez ci dessous

 

A. Desrousseaux (1820-1892)

Écrite par Alexandre Desrousseaux, employé aux contributions à la mairie de Lille, l' Canchon Dormoire paraît en1853. C'est sous le nom du P'tit Quinquin qu'elle connaît le succès.

Refrain

Dors, min p'tit quinquin, Min p'tit pouchin min gros rojin, Te m'fras du chagrin, si Te n'dors point qu'à d'main.

Couplets

Ainsi, l'aut' jour eun' pauv' dintellière, In amiclotant sin p'tit garchon, Qui, d'puis tros quarts d'heure, n'faijot qu'braire, Tâchot d'lindormir par eun' canchon. Ell' li dijot : Min Narcisse, D'main, t'aras du pain n'épice, Du chuc à gogo, Si t'es sache et qu' te fais dodo.

Refrain : Dors, min p'tit quinquin, etc…

Et si te m' laich' faire eun' bonn' semaine, J'irai dégager tin biau sarrau, Tin patalon d' drap, tin giliet d' laine… Comme un p'tit milord te s'ras farau ! J' t'acat'rai, l' jour de l' ducasse, Un porichinell' cocasse, Un turlututu, Pour juer l'air du Capiau-pointu.

Refrain : Dors, min p'tit quinquin, etc…

Nous irons dins l' cour Jeannette-à-Vaques, Vir les marionnett's. Comme te riras, Quand t'intindras dire : "Un doup' pou' Jacques ! Pa' l' porichinell' qui parl' magas !… Te li mettras dins s' menotte, Au lieu d' doupe, un rond d' carotte ! I t' dira : Merci !… Pins' comm' nous arons du plaisi !

Refrain : Dors, min p'tit quinquin, etc…

Et si par hasard sin maîte s' fâche, Ch'est alors Narciss' que nous rirons ! Sans n'n avoir invi', j' prindrai m'n air mache, J' li dirai sin nom et ses sournoms, J' li dirai des fariboles, I m'in répondra des drôles, Infin, un chacun Verra deux pestac' au lieu d'un…

Refrain : Dors, min p'tit quinquin, etc…

Allons serr' tes yeux, dors min bonhomme, J' vas dire eun' prière à P'tit-Jésus, Pour qu'i' vienne ichi pindant tin somme, T' fair' rêver qu' j'ai les mains plein's d'écus, Pour qu'i' t'apporte eun' coquille, Avec du chirop qui guile Tout l' long d' tin minton… Te t' pourléqu'ras tros heur's de long !

Refrain : Dors, min p'tit quinquin, etc…

L' mos qui vient, d' Saint-Nicolas ch'est l' fiête, Pour sûr, au soir, i' viendra t' trouver. I' t' f'ra un sermon, et t' laich'ra mette, In d'zous du balot, un grand painnier. I' l' rimplira, si tes sache, D' séquois qui t' rindront bénache, Sans cha, sin baudet T'invoira un grand martinet.

Refrain : Dors, min p'tit quinquin, etc…

Ni les marionnettes, ni l' pain n'épice N'ont produit d'effet. Mais l' martinet A vit' rapajé l' petit Narcisse, Qui craingnot d' vir arriver l' baudet. Il a dit s' canchon-dormoire… S' mèr' l'a mis dins s'n ocheinnoire : A r'pris sin coussin, Et répété vingt fos che r'frain :

Refrain : Dors, min p'tit quinquin, etc…

 

Haut de page

Commentaires (2)

1. jean mi 09/04/2013

Chanson qui a magnifiquement été interpretée par Raoul de Godewarsvelde à qui je rends hommage dans ma chanson "A toi Raoul"

2. Jean-Pierre MATHIEU 13/09/2020

Merci Jean-Michel de me faire entendre jusqu'au bout cette célèbre chanson du Nord ! J'aime

Ajouter un commentaire